25 Johr vorbei!
Mensch, wor des ne Danzerei!
Solang gebts die Danzanstalt.
Här, jetzt wermer langsam alt!
Anfangs konnte känner nix.
Awwer mer warn jung un fix.
Desterweeche lernte mir
danze, drinke, Woi un Bier.
25 Johr vorbei!
Mensch, wor des ä Danzerei
Langsamer Walzer geht in de Bäh;
Awwer trotzdem isser schäh!
Tango geht zu sehr in Hals.
Nix fer uns hier inne Palz!
Slowfox sieht schä aus, doch schade:
Der geht zu sehr in de Waade.
Walzer schreckt de Leit der Disco
weltweit vun Berlin bis Frisco.
Doch de Quickschdepp, der hot Pepp;
bloß kenne duhts net jeder Depp.
Schä is aach de Dcha-Dcha-Dcha,
ringelreih tirallalla.
Rumba-Hifte, hohl des Kreiz,
ferdert schdark de Liewesreiz.
Volle Äkdschn dann beim Samba.
Do konnschd schaffe wie ne Mamba.
Madschos danze Pasadobel.
Do is Chef de klännschde Pobel.
Un zum Schluss gibt’s noch de Dschaiv,
der is Lewensluschd echt leif.
25 Johr vorbei.
Mensch, war des ne Danzerei!
Ehr seid alle so patent,
Eier Zukunft is potent,
wanner immer immanent
des macht, was ich Eich jetzt send:
Immer danze, turbulent;
Neies mache, wie de Trend;
iwe, iwe mit Talent;
Kasse halle, gut solvent;
Trainer un de Referent
kompetent un konsequent;
Meckern kille, evident;
Danze ferdern mit Akzent;
ab un zu aach abschtinent;
Leischdung bessre, doch dezent;
Freindlich soi, dass kenner flennt.
Wanner des oihalt ab dem Moment,
Ehr hunnerd Johr alt werre kennt.
Alles Gute heit un ferner
vun de Thea un ehrm Werner.
25 Johr vorbei!
Här mer uff mit Danzerei!
Werner Kurze, Neuhofen, 27.10.2007